دیوید کمرون وزیر خارجه بریتانیا٫ در دیدار با امامعلی رحمان، رئیس‌جمهور تاجیکستان در شهر دوشنبه گفته که کشورش به دنبال «فصل جدید» در روابط با آسیای میانه است.
این نخستین بار است که یک وزیر خارجه بریتانیا به تاجیکستان سفر می‌کند.
دیوید کمرون روز دوشنبه، سوم ثور، در دیدار با امامعلی رحمان، رئیس‌جمهور تاجیکستان در کاخ ملت در دوشنبه، گفت که ما می‌توانیم در زمینه‌های کلیدی مانند تجارت، تغییرات آب و هوا و مبارزه با تروریسم همکاری کنیم و «کارهای بیشتری انجام دهیم.»
او از اینکه اولین وزیر خارجه بریتانیا است که به دوشنبه سفر می‌کند، ابراز خوشحالی کرد. با این حال خطاب به امامعلی رحمان گفت متاسف است که سفر یک وزیر خارجه از بریتانیا به تاجیکستان «اینقدر طول کشید.»
وزیر خارجه بریتانیا افزود ما می‌خواهیم «عصر جدیدی» را در روابط بریتانیا با آسیای میانه آغاز کنیم و این دوره جدید را از تاجیکستان شروع می‌کنیم.
وزیر خارجه بریتانیا در روزهای آینده به قرقیزستان، اوزبیکستان، ترکمنستان، قزاقستان و مغولستان می‌رود.
آقای کمرون گفت او به تاجیکستان سفر کرده تا بگوید «بیایید کارهای بیشتری با همدیگر انجام دهیم.» و «بیایید همکاری‌ها را گسترش دهیم.»
